Fjölskylduvika í tilefni af degi leikskólans

Dagur leikskólans er haldinn hátíðlegur í fimmta sinn í dag en 6. febrúar er merkilegur dagur í íslenskri leikskólasögu því þann dag árið 1950 stofnuðu frumkvöðlar leikskólakennara sín fyrstu samtök.

Af því tilefni erum við með fjölskylduviku. Þá gefst foreldrum tækifæri til að koma og fylgjast með leik og starfi barna sinna. Kjósi foreldrar að vera í morgunmat, hádegismat eða síðdegishressingu þá biðjum við um að við verðum látin vita með fyrirvara.

Dagur leikskólans er samstarfsverkefni Félags leikskólakennara, Félags stjórnenda leikskóla, mennta- og menningarmálaráðuneytis, Sambands íslenskra sveitarfélaga og Heimilis og skóla. Tilgangurinn er að auka jákvæða umræðu um leikskólann, vekja umræðu um hlutverk leikskóla og starf leikskólakennara og kynna starfsemina út á við. Dagur leikskólans er nú haldinn í fimmta sinn. Í tilefni dagsins hefur m.a. verið auglýst eftir gullkornum frá börnum í leikskólum landsins.